Озод юртнинг бахтиёр фарзандлари

Кеча мамлакатимиздаги барча мактабларда “Билимлар куни” катта тантана билан ўтказилди.

Ватанимизнинг тараққиёти йўлида, жаҳон ҳамжамиятидаги нуфузи ва обрўсининг тобора юксалишида, ҳаётимизнинг барча йўналишларидаги ислоҳотларни чуқурлаштириш, жамиятимизни янгилашда ёш авлод таълим-тарбияси муҳим ўрин тутади. Шу  боис  юртимизда таълим тизимини тубдан ислоҳ қилиш давлатимиз сиёсатининг устувор йўналишларидан  бири этиб белгиланган. Президентимиз ташаббуси билан соҳага изчил татбиқ этилган “Таълим тўғрисида”ги Қонун, Кадр­лар тайёрлаш миллий дастури, Мактаб таълимини ривожлантириш Давлат умуммиллий дастури жаҳон андозалари даражасидаги таълим даргоҳларини барпо этиш, мавжудларини қайта реконструкция қилиш, капитал ва жорий таъмирлаш, уларнинг моддий-техник базасини мустаҳкамлаш, замонавий ўқув-лаборатория ускуналари, жиҳозлар, компьютер техникаси билан таъминлаш имконини берди.

Мактаб таълимини ривожлантиришда туб бурилиш ясаган юқоридаги Дастурда 5 та устувор йўналиш бўйича изчил ислоҳотлар амалга оширилди. Ўтган давр мобайнида республикамиздаги жами 9772 та мактабнинг 8501 тасида, яъни 3 млн. 12 минг ўқувчи ўрнига мўлжалланган мактабларда қурилиш-тиклаш ишлари амалга оширилди. Ушбу мақсадга 1,4 трлн. сўм миқдорида маблағ сарфланди. Умуман, мус­тақиллик йилларида 1559 та мактаб биноси янгидан қурилди, 8213 таси таъмирланди.

Фахрлансак арзийдики, Умуммиллий дастурда мактаб биноларини янгилаш ва таъмирлашдан ташқари, уларни ўқув жиҳозлари, компьютер технологиялари, дарс­ликлар билан таъминлаш борасида ҳам кенг кўламли ишлар назарда тутилган. Бу борада амалга оширилган саъй-ҳаракатлар салмоғини яққол тасаввур этиш учун мактабларимизнинг замонавий ўқув-лаборатория ускуналари, компьютер техникаси, дарсликлар ва ўқув-услубий материаллар билан таъминланишига доир қуйидаги рақамларни келтириш кифоя: мавжуд таълим муассасалари сонига нисбатан физика лаборатория хоналари сони 7149 тага, кимё лаборатория хоналари 6896 тага, биология хоналари 6896 тага, улардаги спорт заллари 4675 тага етди.

Агар 2004 йилда республика бўйича, бор-йўғи, 1213 та умумтаълим мактаби замонавий компьютер техникаси билан таъминланган бўлса, бугунги кунга келиб, бундай имкониятга эга мактаблар сони 5091 тани ташкил этади.

— Боланинг келажакда қайси касбни эгаллаши, қандай феъл-атвор эгаси бўлиши унинг аввал-бошдаги тарбиясига, камол топаётган оиладаги муҳитига боғлиқ, — дейди Республика мусиқа ва санъатга ихтисослаштирилган мактаб-интернат директори Зулфиқор Холмирзаев. — Шу маънода, Президентимизнинг “Болалар мусиқа ва санъат мактабларининг моддий-техник базасини мустаҳкамлаш ва уларнинг фаолиятини янада яхшилаш бўйича 2009 — 2014 йилларга мўлжалланган Давлат дастури тўғрисида”ги қарори ёш авлод тарбиясига қаратилаётган ғамхўрликнинг яна бир амалий тасдиғи сифатида аҳамиятлидир. Бизнинг муассаса бугунги кунда республикамизда пуфлаб чалинадиган ва зарб­ли асбоблар йўналишида  мутахассислар тайёрлайдиган ягона ўқув даргоҳи ҳисобланади. Шунингдек, мактаб-интернатда санъатнинг рассомлик, ҳайкалтарошлик, ганчкорлик ва ўймакорлик, хорижий тиллар, сухандонлик ва актёрлик йўналишида мутахассислар тайёрлаш билан бир қаторда, умумтаълим фанлари ҳам ўқитилади. Янги ўқув йили олдидан мусиқий таълим олиш учун зарур бўлган ­чолғу асбобларининг барчаси тахт қилиб қўйилди, эскиларининг ўрнига янгилари харид қилинди.

Бу йил жами 9772 та умумтаълим мактабида 4 681 457 нафар ўқувчи мактаб таълимини давом эттиради. Шулардан 474 900 нафарга яқин болажонларимиз таълим даргоҳининг қутлуғ остонасига илк бор қадам қўяди. Таъкидлаш керакки, ҳар янги ўқув йили бошида мамлакатда аҳолининг ижтимоий ёрдамга муҳтож қатлами болаларига аниқ манзилли моддий ва маънавий ёрдам кўрсатилади. Биргина охирги 5 йил давомида 314,3 млн. нусха дарслик ва ўқув-методик қўлланмалар чоп этилиб, ­таълим муассасаларига етказиб ­берилди. Ўқувчиларда билим олишга бўлган  рағбатни кучайтириш, китобга ижобий муносабатни юзага келтириш мақсадида 1-синф ўқувчиларига ҳар йили янги дарсликлар Президент совғаси сифатида бериб борилмоқда. 2 — 4-синф дарсликлари ҳар икки йилда, 5 — 9-синф ўқув ­адабиётлари эса ҳар тўрт йилда мунтазам янгиланмоқда. Уларнинг ота-оналар, ўқувчилар учун қулай бўлган ижара ­тизими асосида ­берилиши эса мамлакатимизда аҳоли ижтимоий муҳофазаси ­доимий устуворлик касб этиб ­келаётганлигининг яна бир ­ифодасидир.

Анъанага кўра, янги ўқув йилидаги биринчи сабоқ Мус­тақиллик дарси билан бошланди. Бу дарсларда ўқувчиларга халқимизнинг энг буюк ютуғи бўлган Мустақиллик биз учун ўзлигимизни англаш, юрт тинчлиги ва бар­қарорлигининг, ­инсон манфаати, эркинлиги ва фаровонлигининг, биз кўзлаган демократик жамият барпо этишнинг гарови эканлиги ҳаётий мисоллар билан синг­дирилди.

Мақсуд ЖОНИХОНОВ,

«Халқ сўзи» мухбири.